Jafnrétti

Fullkomið jafnrétti næst aldrei á meðan horft er kynjagleraugum á heiminn. Sífelldur samanburður eyðileggur jafnréttisgrundvöllinn og byggir jafnóðum ofaná þann þröskuld sem reynt er að eyða.

Brandur og Leifur

Bræðurnir Brandur Ari og Leifur Arnar eru báðir í íþróttum á sama tíma, en ekki á sama stað. Einhvertíma var faðirinn að skipuleggja ferðir þeirra og sagði við móðurina: "Ég fer með Brand Ara, þú tekur Leif Arnar."

Gleðileg jól!

Um helga tíð er hækka fer
á himni blessuð sólin
gæfustjarnan gefi þér
sem gleðilegust jólin!

Með undanþágum skal land byggja

Á Íslandi er mjög takmörkuð virðing borin fyrir gildandi lögum.  Því þykir tilhlýðilegt að höfða skaðabótamál á hendur stjórnvöldum, sem ekki veita undanþágu frá þeim!

Auglýsing

Næsta laugardag, 19. nóvember, verða opnar fyrir gesti og gangandi tvær vinnustofur í Litalandshúsinu, Furuvöllum 7, Akureyri. Í annari þeirra málar myndir Aðalbjörg Kristjánsdóttir og vinnur margskonar listmuni. Í hinni fæst Hallmundur Kristinsson við svipaða iðju.  Þeir sem hafa áhuga og tök á að líta inn eru hjartanlega velkomnir á milli kl. 13 og 17.

Borið í bakkafullan

Að yrkja reynast mun aldrei snúið
okkur sem snilli hýsum.
En skyldi ekki vera bráðum búið
að búa til nóg af vísum?

Í boði ellinnar

Meiriháttar minnistöp
- má nú um það rita -
eru kölluð elliglöp
eins og flestir vita!

Móðurmálið

Íslenska er góð fyrir grúskara
og gagnast við allskonar blekkingar.
Heillar jafnt fagmenn og fúskara
sem fýsir að afla sér þekkingar.

Fátæktarlimra

Menn framvísa böggluðum bleðli
og borga með ónýtum seðli.
Og lítið menn fá
ef laun eru smá.
Það liggur í hlutarins eðli.

Skjálftavirkni

Á oss dynur vá og voði
sem vissulega engan svíkur.
Af skelfingu menn skjálfa í boði
Skjálftaveitu Reykjavíkur.