Algjörir englar

Okkar þjóð má ekki brengla.
Ötult liðið fer á stjá;
Vill hér enga Vítisengla.
En vopnagerðin funda má.

Næsta frétt:

http://visir.is/article/20071029/FRETTIR02/71029026

Dæmdur fyrir  að nauðga kynlífsdúkku.

Alþjóðavæðing

Til að forðast fjósamennsku
og flónsku óuppdregna
mun víst best að yrkja á ensku
útrásarinnar vegna.

Raunar mun ég þurfa að ráða til mín undirverktaka þar sem ég hef ekki nægilegt vald á enskri tungu……

Gleðitíðindi

Þau notuðu vonlausa vörn
vinirnir Magga og Björn
er sumt gerðu saman
sem þeim fannst gaman.
Nú eignast þau bráðlega börn.

Eitt enn...

...sem fer í taugarnar á mér:  Bloggarar sem skrifa undir dulnefni.

Heimspeki

Þessi svokölluð samtíð
sem að við lifum í
er bara fyrrum framtíð.
Finnst ykkur vit í því?

Bolur Bolsson - minning

Þér skal rétta línan lögð
langi þig að blogga;
vilja engin bolabrögð
bloggstjórnendur Mogga.

Hugsi-hugs

Til að fyrirbyggja hugsanlegan misskilning vil ég taka það sérstaklega fram að í eftirfarandi stöku er skáldið ekki að meina neina sérstaka einstaklinga. (Yfirhöfuð reyndar ekki að meina neitt, þótt það megi nú ekki vitnast, því það rýrir gildi skáldskaparins.)

Ættgeng er varla sú veila
sem virðist þó marga hrjá,
sem eru með handknúna heila
og hugsa oftast á ská.

          
 

Kolefnisjöfnuður

Mig langar að láta kolefnisjafna bílinn minn. Hugsa að gangurinn verði þýðari við það.
Ég byrjaði að leita í símaskránni. Fann ekkert kolefnisjöfnunarverkstæði. Kannski væri hægt að fá bara kolefnisjafnaðarmann heim til þessa verks. Kolefniskrata. Skyldi Össur vera kolefniskrati? Ég kann ekki við að hringja í hann og spyrja. Þekki hann ekki neitt. Umfram það sem maður  kynnist opinberum persónum í fjölmiðlum. Hvað á ég að gera? Segið mér ekki að fara og planta trjám. Ég ætla sko ekkert að fara að kolefnisjafna fyrir Pétur og Pál. Bara minn eigin bíl og ekkert annað. Það er annars ljótt með bílafjölgunina í Kína. Svei mér sem þeir þurfa að kolefnisjafna. Spurning hvort það er nokkurt pláss fyrir öll þau tré sem til þess þarf.

Svangur þótt auralaus væri

Bófinn ekki borgað gat
baunasúpu og læri.
En það var ljóst hann þurfti mat
þó að blankur væri.

Áttu ekki fyrir reikningunum