Heimsókn

Gúggla má í gríð og erg,
góða vegi feta;
eitthvað sem hann Zucker­berg
sjálfsagt kann að Meta.

Mark Zuckerberg á Akureyrarflugvelli

Borgarstjóri?

Framtíðin er bara Björt.
Borgina skal fanga.
Af því Dóra er ekki svört
ætti það að ganga.

Persónulegt og pólitískt spjall við Einar

Endur taldar í Garðabæ

Þegar ekki kemst inn réttur raftur,
ramminn gæti verið illa skaptur.
Í kjörkassanum liggur leyndur kraftur.
Lausnin er að telja bara aftur!

Endurtalið í Garðabæ á morgun

Misjöfnuður

Þeir velstæðustu víða leita fanga.

Virðast aldrei taka stefnu ranga.

Hinir þeir hrapa

og heiðrinum tapa,

sem ævinlega á horriminni hanga.

Aðsókn

Framsókn nú stödd er á fallegum stað,

fjölmargir kostum skarta.

Að lukkunnar velstandi leitað er að

lyklinum (þessum svarta).

Framsókn til í borgarstjórastólinn

Dagurinn í dag

Misjafn virðist mannsins hróður,
sem margir raunar hrósa.
Dúndur- eða drullugóður
Dagur til að kjósa!

„Þetta er frábær dagur til að kjósa“

Þarna bjátar eitthvað á

Eitthvað er víst döpur daman;
doði honum segir taman.
Þau eru hætt að sofa saman,
sem þeim áður fannst þó gaman,

Íslenskt par er hætt að sofa saman - hvað er til ráða?

Góðan Dag inn!

Óska má að seggur sá
sannleiks fái að njóta,
sem teygði lögin til og frá
en tókst þó ekki að brjóta.

Hafna því alfarið að lög hafi verið brotin

Adidas

Verndum börnin, vörumst perra,
sem víða fylla bekki.
Einkum vegna brjósta berra
birtum þetta ekki.

Banna Adidas auglýsingu vegna berra brjósta

Kæra

Efalaust kemst allt í lag
og við lausnir finnum
þegar fyrir dómstól Dag
drögum nokkrum sinnum.

Kæra borgarstjóra fyrir lögbrot