Að norðan II

Sveimandi hugana getur oft glatt
góða veðrið - og staka.
Hamingjuríkur ég segi það satt,
sólin er komin til baka.

Norðlenskar staðreyndir

Til að viðhalda ævafornum og meinhollum hrepparíg væri ekki úr vegi að dusta rykið af vísum sem ég setti saman fyrir fáum árum. Þær eru að sjálfsögðu sígildar og  aldrei of oft kveðnar.

     Hjá Skagfirðingum leynast fáir lestir,
     því ljósir margir eru þeirra grönnum.
     Og Húnvetningar hafa sjálfsagt flestir
     hæfileika til að líkjast mönnum.

     Að Þingeyingar séu manna mestir,
     meining þeirra leyna sjálfir eigi.
     En alltaf reynast Eyfirðingar bestir
     þótt um það helst af lítillæti þegi.

Lítillátur ljúfur kátur

Þessa vísu orti ég upphaflega um sjálfan mig, en breytti henni snarlega til almennrar skýrskotunar vegna eðlislægs lítillætis.

Ekki eru dáðir dánumenn
dauðir úr öllum æðum.
Vísurnar margar yrkja enn
ótrúlegar að gæðum.

Að norðan

Þótt vindurinn blási á móti mér
ég missi ekki á sumarið trúna.
Sannarlega mér sýnist hér
sunnanviðhúsveður núna.

Kona

Yndi býður af sér mest,
auga leið það gefur
að hún er í bóli best
og blíðust þegar hún sefur.

Er það ekki?

Eins og bjarmi af ástarbáli

eykur losta friðilsins

þeir sem blogga í bundnu máli

bæta ímynd miðilsins.

Fríríki

Ég held að bæjarstjórann í Hafnarfirði langi til að stofna fríríki fyrir Alcan á uppfyllingu út frá Sraumsvík.

Ádeila

Oft má nýta andans ruður.
Er það margra siður
að yrkja bæði út og suður
en allramest þó niður.

Af Jörundi

Þegar Jörundur Friðbergsson á Húsatóftum í Vestari-Miðfirði kom á
heilsugæsluna á Rauðasandi til skoðunar og var  spurður hvort hann væri
ekki fastandi, svo sem fyrir hann hefði verið lagt,svaraði hann með
þessari vísu:

Fæðið skerða fráleitt vil;
Frjálslegt er það orðið.
Matnum gerði makleg skil
við morgunverðarborðið.

Var þetta í fyrsta og eina skiptið sem hann heyrðist mæla stöku af munni
fram og höfðu menn raunar aldrei  til þess vitað að hann væri hagmæltur.

Heimild: Þjóstólfur 3.tbl.8.árg bls.13 ofarlega.

Enn um Hildi

Það má  ekki málinu neita.

Mótlætið gerði hana feita.

Hún át bara og át

ekki með gát. 

Það gengur nú svona til sveita.

sjá: