Gamalt vín?

Ef þetta þannig gengur
sem þæfð sé gömul flík,
mig langar ekki lengur
að ljóða um pólitík.

Auknar líkur á þriggja flokka stjórn

Alvara málsins

Allir víst þurfa að færa hér fórn
og fjarlægjast eigin rætur
því mynda þarf fljótlega starfhæfa stjórn
sem stendur í alla fætur.

Guðni boðar til blaðamannafundar

Auglýsing

Slæmt gerist veður og slóðin er grýtt,
slepjugt er fólkið og lúið.
Umboð er gefins á Notað og nýtt,
næstum því ekkert fúið.

Enginn einn flokkur fær umboðið

Ekki ostur

Til að mynda margra stjórn
mundi þurfa nostur,
en að þurfa að færa fórn
er fráleitt veislukostur.

Framsókn áhugalaus um samstarf

Stjórnmálaskýring. Sett fram kl.13:30

Fljótlega losnar fjandinn.
Fæðist Þrándur í Götu.
Ég held að Viðreisn sé vandinn
í veginum fyrir Kötu.

Búið að slíta stjórnarviðræðum

Málið er flókið

Nú er sá árstími að nóttin er dimm
og nöpur snævarins þekja.
Svo er að vita hvort flokkarnir fimm
flækjurnar nái að rekja!

Stjórnarmyndunarfundum lokið í dag

Dagur íslenskrar tungu

Veruleikann varla flý.

Vont er að falla í sprungu.

Nonni litli datt í dý

á degi íslenskrar tungu.

Dagur okkar ástkæra og ylhýra

Björt Viðreisn

Með Bjartri Viðreisn Bjarni leikur;
bitlitlum hann veifar kuta,
enda mun hann eitthvað smeykur
um alltof lítinn meirihluta.

Byrjað á sáttmála um helgina

Lengi skal umboð reyna

Framtíð er björt hjá Bjarna.

Bensinn er klár í túr,

þótt öll séu berin þau arna

átakanlega súr.

Fjölbreytt vöruúrval

Hæpinn er okkur greiði gerður;
ganga skulum mjóan planka.
Eftir að sjá hvort vinsælt verður
vöruframboð Íslandsbanka.

Gert til að fækka reikningum