Kannski ekki besta orðið.

Núna hafa menn skálkana skoðað
í skýrslu frá rannsóknarnefnd.
(Varla úr rímorðum mörgum fæst moðað.
Man varla annað en hefnd!)

Blekktu stjórnvöld vísvitandi

Bótasvikin brugðust

Í umfjöllun Kastljóss um ætluð bótasvik sá ég glitta í blómaskreytingakonu.

Yfirvöldin illa sveitt
ætluðu sér að vega
bótasvikin blómum skreytt
sem brugðust algjörlega.

Er það ekki bara?

Við viljum engan grefils grút
sem gróða okkar heftir:
Við flytjum bara fiskinn út
og förum sjálf á eftir.

Afkoman í frjálsu falli

Kveðja úr Reykjanesbæ

Hér er ég búandi í brælunni,
bölvandi helvítis þvælunni.
Arsenikisti
orðinn og missti
andann af silikonsvælunni.

Vara menn við að hrapa að ályktunum

Búum til ríkisstjórn

Ekki dugir hér neitt hangs,
hefjum okkar starf.
Án alls fúsks og flumbrugangs
finnum allt sem þarf.

„Ekkert fúsk og engan flumbrugang“

Stjórnarmyndunartregða

Prýðilega passa spár
pólitísku þvargi:
Falla munu flestar ár
fram af næsta bjargi.

Geta ekki setið aðgerðalausir

Eggjamálið í hnotskurn

Hið opinbera býr til merki á vistvæna vöru. Það býr til reglugerð um eftirlitskerfi sem standa á undir merkinu, ábyrgjast að varan sé vistvæn. Neytendur verða glaðir.
Eftirlitskerfið bregst. Hið opinbera hleypur undan merkinu;
afnemur reglugerðina. Auglýsir að það standi ekki lengur að merkinu. Auglýsir það mjög vandlega. Meira að segja í lögbirtingablaðinu, svo það fari nú ekki framhjá neinum.
Vöruframleiðendur mega nota merkið áfram á eigin ábyrgð.
Neytendur verða annaðhvort að treysta framleiðendum eða heimsækja þá: Bank - bank - er ekki allt i lagi hjá ykkur?
Þið neytendur sem vissuð ekki að hið opinbera hafði hlaupið undan merkjum: Þið áttuð bara að fylgjast betur með! Lásuð þið ekki einu sinni Lögbirtingablaðið??

Skoða að fá utanaðkomandi vottun

Reyna má

Ekki þarf á Bjarna bann
í bráðastjórnarmynstri,
lánist Kötu að leiða hann
langt,langt,langt til vinstri.

Bjarni og Katrín funda í dag

Gamalt húsráð

Heillaráðin fornu flest

fyrir leggjum:

Vandræðin þau bakast best

með brúnum eggjum.

Aldrei verið vistvæn framleiðsla

Biðmál

Allt er málið enn í bið
orðið nokkuð heitt.
Skýtur hérna skökku við;
skýrist ekki neitt.

Styttra á milli Sjálfstæðisflokks og VG