Herhvöt

Góðu konur, mætu menn!
Á meðan geisar veira,
höldum takti, yrkjum enn,
ekkert gleður meira.

Tilfellin komin í 171 hérlendis

Reynslubolti

Mitt líf er töluvert meira en hálft.

Marga ég lífsgildru þekki.

Veröldin þykist oft sakleysið sjálft

sem hún í raun er þó ekki.

Smit (shit)

Alltaf þau smituðust meira og meira.
Magnaðist Covidsins flæði.
Núna þurfa þau Vírus og Veira
að vera í sóttkví bæði.

Tólf þúsund bókað tíma í skimun

Örsaga

Þótt hljómaði sunnudagssónatan,
sögðu þau bæði fátt
þegar Júlía Jónatan
játaðist -  á sinn hátt.

Án sérstaks tilefnis

Á öðrum fæti að hætti hanans
hreykja sér stundum enn;
losa sig mættu úr viðjum vanans
vithverfir stjórnmálamenn.

Atvik

Verknað áðan fúlan framdi.
Fékk af nokkurn hnjóð.
En vísan um hann sem ég samdi
var sæmilega góð.

Það sæmir nú varla að segja því frá
hve siðlítið atvikið var.
Ef nánari lýsingar fýstirðu að fá
þú fengir víst ekkert svar.

Yfirlýsingu vil ég þó veita:
Það var ekki beinlínis synd.
Að sjálfsögðu mætti svo öllu því neita
sem ekki náðist á mynd.

Yfir fátæktarmörkum

Maður nokkur sagði eitthvað á þá leið að það kostaði blóð svita og tár að komast til valda, og því skyldi maður þá ekki vilja halda í þau meðan stætt væri:

Í embætti langar að lafa.
Ljómum af völdunum stafa
Í sig og á
ætti hann þá
ábyggilega að hafa.

Oft er misjafn sauður í mörgu fé

Af gefnu tilefni þótti mér skemmtilegt að snúa upp á gamalt máltæki en það getur hæglega haft almenna tilvísun.

Þótt ýmislegt hæpið í ummælum sé,
ei skal ég tökin herða.
Margur er sauður í misjöfnu fé.
Mun það svo lengi verða.

Ekkert svoleiðis

Um það stundum heyrt ég hef.
Hérna um það krota;
Einhver keypti aflátsbréf
til ýmiskonar nota.

„Eru ekki að kaupa sér syndaaflausn“

Upprunavottorð

Ég vil fá upprunavottorð. Upprunnin fyrir margt löngu. Ég er semsagt á eftirlaunaaldri. Ætla að selja upprunavottorðið til einhverra sem ekki hafa náð svo háum aldri til þess að þeir gætu hætt að vinna og fengið eftirlaun.