Horft inn á við

Stundum líkt og heimtur út úr hól
hef ég virst frá ýmsu sjónarmiði.
Ætli ég sé ólíkindatól?
Og þá skást að vera það í friði.

Léttvæg

Hérna vil ég gjarnan leggja lóð.
Listarinnar vogarskálar þekki.
Þessi vísa er varla nógu góð.
Vel ég því að birta hana ekki.

Veiruvers

Þótt vaxi blóm í þinni krús
og þín séu augun vot,
hér færðu ekkert hlýlegt knús
heldur olnbogaskot.

Hvatning

Aldrei verði menning mát.
Und merkjum rísum.
Hvorki skyldi á ljóðum lát
né lausavísum.

Á meðan límið þornar

Allnokkurn hluta starfsæfi minnar vann ég á smíðaverkstæði Leikfélags Akureyrar. Fyrir kom að þar voru smíðaðar vísur.

Ein þeirra var eitthvað á þessa leið:

 

Af orðsins list og andans dug

eru vísur bornar.

Manni dettur svo margt í hug

á meðan límið þornar.

 

Datt mér í hug að gæfi ég út verkstæðisvísur væri síðasta vísuhendingin upplagt nafn á kverið.

Þurrð

Nú vildi ég gjarnan eitt vísukorn rita
þótt vanti til yrkinga dug.
En auðvitað læt ég hér óðara vita
ef eitthvað mér dettur í hug!

...og 6 - 8m á milli bíla

Minni umferð vegna veirunnar

Hmm. Dagur ljóðsins, já.

Ég er nú meira í lausavísunum. En í tilefni dagsins skelli ég hér inn einu, sem farið er reyndar að eldast.

Þegar loks héðan af foldu ég fer
og fjörið er storknað í æðum,
þá verður enginn sem man eftir mér
og mínum ágætu kvæðum.

Þá minnist mín enginn af íslenskri þjóð,
og enginn mun kvæði mín þylja,
því þegar ég yrki þá yrki ég ljóð,
sem enginn fær megnað að skilja.

2m

Frestast nú verða öll faðmlögin hlý.
Fulla tvo metra spanni
millibil þeirra sem eru nú í
almennu nálgunarbanni.

224 staðfest tilfelli kórónuveiru

Vonbrigði

Eru slæm ef að er gáð
örlög minna vona.
Vorið kemur vart í bráð
fyrst veðráttan er svona!

Losuðu um 100 bíla á Öxnadalsheiði