Sveiattan

Þá taka til máls lágtvirtir aldraðir og öryrkjar:

Fláttvirtur meirihluti!

Nirflar engin nota rök.
Niðurstaða er fengin.
Ekki bítur seka sök
því samviskan er engin.

Breytt fjárlög samþykkt

Froðusnakk

Það er ljótt með þetta pakk.
Þannig má nú yrkja:
Það rembist við að ræða snakk
en RUV vill ekki styrkja.

Snakktollurinn ræddur á þingi

Pólitíkin

Fregnum af þinginu fráleitt ég leyni.
Það fóðrar athyglissýkina
og örugglega því áfram ég reyni
að yrkja um helvítis tíkina.

Nei

Ég skil nú bara ekki hvernig fólk sem hefur fengið hundruð þúsunda í afturvirkar kjarabætur getur sagt nei við því að elli- og örorkulífeyrisþegar fái hækkun á sínum launum frá sama tíma.

Atkvæðagreiðsla stendur enn yfir

Frá Alþingi

Veikum og öldruðum vikan er sár.
Veruleikinn er sýndur.
Í Alþingisbjöllunni hljómur er hár
og heilbrigðisráðherra týndur.

 

„Menn eru í algjörri sjálfheldu“

Frá Alþingi

Ef einhver skyldi ekki vita það, þá fara nú fram umræður á Alþingi um um fjárlagafrumvarp ríkisstjórnarinnar.
Þau orð sem hvað oftast hljóma í ræðum
gagnrýnenda þess er "borð fyrir báru."

 

Naumt sér við neglur skáru
að nirfla hæstvirtra sið,
þótt nú sé borð fyrir báru
að bæta einhverju við.

Morgundraumur

Hratt af stað framkvæmdum Sigmundur sá
sem er hin mesta driffjöður:
Útbygging rísa skal Alþingi hjá,
áður teiknuð með skriffjöður.

Heyrðu snöggvast

Á þingfundi í dag var dreift tillögu frá stjórnaþingmanni um
að draga til baka ríkisábyrgð til Íslenskrar erfðagreiningar.

Heyrðu karlinn, Kári minn,
kæri vinur góði,
úti skal með aðgang þinn
að okkar ríkissjóði.

Þingfundi slitið á miðnætti

Jafnvel þótt Óli hætti

Þótt kvæði stundum kveði smá;
kunni að beita amboði
og vinir mínir vilji, þá
verð ég ekki í framboði.

Sirkus Alþingis ekki smart

Í gærkvöldi var fluttur enn einn skrípaþátturinn á útvarp Alþingi. Stefnt var á kvöld- og næturfund, en ekki fékkst uppgefið á nokkurn hátt hversu lengi þingfundur ætti að standa. Aftur og aftur hófust umræður um fundarstjórn forseta, þar sem hver þingmaðurinn á fætur öðrum bar upp þá einföldu spurningu hversu lengi væri áætlað að þingfundur ætti að standa.
Ekki fengust þingforsetar til að gefa nokkuð upp um það og tömdu sér véfréttastíl Bessastaðabónda.
Er ekki kominn tími til að endurskoða þingsköp? Athuga hlutverk þingforseta. Klippa á þræðina sem gerir hann að strengjabrúðu ríkisstjórnarinnar. Verður ekki að fá óháða aðila til að stjórna þingfundum?
Og hjálpa til við að koma á lýðræðislegu þingræði. Og fækka sýningum á þessum opinberu skrípasýningum frá Hinu "Háa" Alþingi.

Mjög af yngri þingmönnum dregið