Baráttan um verðið

Ugglaust geta allir séð
að ekki er grín á ferðum
þegar búðir berjast með
beittum tilboðs(s)verðum!

Algjörir englar

Okkar þjóð má ekki brengla.
Ötult liðið fer á stjá;
Vill hér enga Vítisengla.
En vopnagerðin funda má.

Svindl og samráð

Í verslunum oft eru vörurnar sviknar.
Verðið er bara feik.
Litlum af neistanum loginn oft kviknar.
Lúkas er kominn á kreik.

Næsta frétt:

http://visir.is/article/20071029/FRETTIR02/71029026

Dæmdur fyrir  að nauðga kynlífsdúkku.

Nýyrði

Ég heyrði skemmtilegt nýyrði í kastljósinu áðan:

Ung og fögur íhaldskona
upphóf sína raust,
flutti mál sitt fumlaust svona
fleipitungulaust!

 

Alþjóðavæðing

Til að forðast fjósamennsku
og flónsku óuppdregna
mun víst best að yrkja á ensku
útrásarinnar vegna.

Raunar mun ég þurfa að ráða til mín undirverktaka þar sem ég hef ekki nægilegt vald á enskri tungu……

Auglýsa skaltu náungann eins og sjálfan þig

Nú tóku menn eftir því  í Símaauglýsingunni margumræddu að bæði Jesús og Júdas skiptu við og Vodafon.
Það þótti símamönnum ekki nógu gott og kipptu auglýsingunni úr umferð til lagfæringar.

     Þeim hjá Símanum fannst það frekt
     að finna orma í sneiðinni.
     En er það nú kannski ekki kristilegt
     að koma þeim að í leiðinni?
 

Þetta er sko hugmynd....!

Lögreglan þjónusti þegna,
þeirra annmarka vegna.
Nú langar mig að
hún ljúki við það
að láta strákana gegna.

Lögregla kölluð til vegna deilna um tölvunotkun

Eitt enn...

...sem fer í taugarnar á mér:  Bloggarar sem skrifa undir dulnefni.

Ekki vísa

Hverslags er þetta! Hér gubba ég uppúr mér hverri vísunni á fætur annarri en minnist ekkert á neitt sem fer í taugarnar á mér. Ég kann greinilega ekkert að blogga!

Ég ætla að fjalla hér um þrjár nafngiftir. Eitthvert sameinað sveitafélag hér út með firði er það síðasta sem manni dettur í hug þegar nefnd er Fjallabyggð. Fjöll með stórum staf hafa hingað til vísað beint á Hólsfjöll, sbr. Grímstaðir á Fjöllum, Möðrudalur á Fjöllum o.s.frv.

Hið fjallmyndarlega hús, sem áður gekk undir nafninu Barnaskóli Akureyrar eða Barnaskóli Íslands, skartar nú nafninu Rósenborg. Það var nú annað hús sem gekk undir þessu nafni í denn. Algjör óþurftaraðgerð að planta því á hið aldna skólahús þótt gamla Rósenborg sé ekki til nema á myndum og í minningunni.

Hins vegar þykir mér allt í lagi með nafnið á rísandi menningarhúsi okkar Akureyringa
Það heitir Hof.  Rímar á móti klof.