Það er nú það

Getur oft á steinum steytt.

Stöðugt margir rausa,

þótt vissulega varla neitt

viti í sína hausa.

Umvöndun

Vindur fer úr fréttunum

og frasar verða bitlausir

hjá þeim sem tala alltaf um

hve aðrir séu vitlausir!

Já einmitt

Vini okkar vil ég hrósa.

Vond er ruslakista.

Flestir þeir sem fáir kjósa

færu vel á lista.

Það skal tekið fram að þetta á eingöngu við um þann lista sem umræddur vinur vildi sitja.

„Ég kveð stjórnmálin sáttur“

Hirðuleysi?

Stundum ég hálfilla hirði

um hugsanlegt efni í ljóð,

enda er það varla þess virði

ef vísan er ekki góð.

Vöntunarleysi

Um þetta ég orti.

Enn skal rökum beitt:

Ef skortur er á skorti,

skortir ekki neitt.

Samvinna okkar séra Hallgríms

Ég bendi á að banvæn pest

byrjar oft með hnerra.

"Ungum er það allra best

að óttast Guð sinn herra."

 

"Þeim mun viskan veitast mest

og virðing aldrei þverra,"

er setja sig á háan hest

og hafna öllu verra.

Ætli það ekki bara?

Máttur vísna er margir sjá
mun ótalfaldur.
Þegar ég yrki er ég þá
áhrifavaldur?

Nokkurt samansafn

Komið hefur fyrir besta fólk að muna ekki fyrir hvað uppstigningardagur stendur.

Nú skal skýrð í nokkrum línum

nafngjöf dags í ljóði:

Fór að gá að föður sínum

frelsarinn okkar góði.

 

 

Nú er hún Stebbabúð stekkur.

Stuðlaði að fallinu hrekkur.

Snorri með snilli

sneið fékk af hylli:

Á verslun hans vísaði hlekkur!

 

 

Ákveðið tilefni er ekki gefið upp fyrir þessa vísu,

en það hlýtur að vera hægt að finna eitthvað:

Oft var til útlanda sendinefnd send.

Sífellt fjölgaði ræðunum.

En helvíti finnst mér nú handahófskennd

hnattræn skipting á gæðunum.

 

 

Misheppnað atriði. Tekið skal fram til að gæta fullrar varúðar að þetta er uppspuni frá rótum:

Smeygðu sér bakraddir smeykar inn,

smámæltar, valtar á fótunum.

En verra að víóluleikarinn

var ekki með á nótunum.

 

 

Það er augljós, þykir mér,

þörf á einum léttum

svona þegar ekkert er

almennilegt í fréttum!

 

Ef á flest það svört er sýn

sem er efst á baugi,

þá er ljóst að það er brýn

þörf á léttu spaugi.

 

Nú skal ekki að neinum sneitt.

Nú skal látið vaða!

Vísa ort um varla neitt

veldur tæpast skaða.

 

Sérhverja nótt og sérhvern dag

samviska manna vakir.

Bindast kann um það bræðralag

að bera af sér allar sakir.

 

Víst er svo málum varið að

vel ég aðstæður þekki;

ég get svei mér þá svarið það:

Svoleiðis var það ekki!

 

Einn þótt kuldinn alltaf bagi,

öðrum finnst of heitt,

en eilíft þus af þessu tagi

þýðir ekki neitt.

 

Þó að þið öskrið og æpið

og ykkur sé bölvið tamt,

er ekki heldur hæpið

að haga sér svona samt?

 

Til að gá hvort veröldin virki

ég vakna á morgnana hress,

þá gerist það oft að ég yrki

umfram tilefni þess!

 

 

 

 

 

Eitthvað verður undan að láta

Víst er hægt á gosi að græða.
Góður reynist arðurinn.
En eitthvað lætur að sér hæða
eystri varnargarðurinn.

Hraun rennur yfir eystri varnargarðinn

Ég skil ekki alveg...

"get­ur verið í sótt­kví eða ein­angr­un vegna gruns um að hann sé ekki smitaður af far­sótt ef staðfest er að svo sé."
Lagamál eða bara venjulegt fjölmiðlamál?

Bent á að tilkynna mótmæli á Covid-spjalli