Kulnun elda

Oftast málin eru snúin.
Illt að missa af gróða.
Ekki verða alltaf flúin
endalok hins góða.

Allt sem gott við áttum saman
orðið þreytt og lúið.
Nú er úti næturgaman.
Nú er gosið búið.

Gosinu gæti hafa lokið í morgunsárið

"Spítalinn er auðvitað ekki í neinu þroti“

Að sjálfsögðu súrt er í broti,
en svarið um Lansann er að
auðvitað er hann í þroti
en ekki má tala um það.

Endurvekur "hetjumóðurina“ í von um að fjölga Rússum

Breyta nú skulum við mysu í mjólk.
Mjölið við gerum úr hýðinu.
Nú biðja vil  þjóð mína að framleiða fólk;
það farast svo margir í stríðinu.

Hætta fyrir skáld og hagyrðinga

Nú er gott að luma á lausnum
sem leysa mál og styrkja:
Ef við viljum halda hausnum
hættum við að yrkja!

Brjóstmynd af þekktu skáldi stolið

Fréttamatur

Í Morgunblaði seisei sei
sá ég áðan klausu
um þann flotta Andra Frey;
að hann væri á lausu!

Andri Freyr Viðarsson á lausu

Hlustað með hægra eyra

Hjáróma raddirnar þessar ég þekki.
Þetta eru vinstri flokkar,
vesalingar, sem virða ekki
vel þekktu lögmálin okkar.

Þarf að undirgangast viðurkennd hagfræðilögmál

Æ,æ

Fyrr en oss varir er fjármagnið búið.
Það finnst mér auðvitað leitt;
ekki er á hungursneyðina snúið.
Snauðir fá ekki neitt.

Snúin staða sem kemur ekki á óvart

Hraun

Flugvallarmálið kom við kaun.
Komið er á blað:
Hví ekki að nota Hvassahraun?
Hvað er slæmt við það?

Á góðum stað þeir vilja völl.
Þar verðug rísi ferðahöll,
en um það vita varla baun
hvort velli  þar upp meira hraun!

Ekki megi dæma Reykjanesið úr leik

Mistök

Ekki verður óskasvið
alltaf kosið.
Illa passar veðrið við
vinsælt gosið.

 

Um tíu bjargað úr Meradölum

Dagur og Einar segja flugvöll í Hvassahrauni ekki úr myndinni

Flugvallarmálið kom við kaun.
Komið er á blað.
Hví ekki að nota Hvassahraun?
Hvað er slæmt við það?