Sveitasæla

http://www.visir.is/article/20071125/FRETTIR01/71125031 

Ennþá er fagurt í íslenskri sveit.
Uppá þar margt við bjóðum.
Þó sjást varla lengur beljur á beit
og bændunum fækkar óðum.

Það þótti nú reyndar fegurra í mínu ungdæmi að tala um kýr. Belja var hálfgert skammaryrði og eins var með rollu.
En þeim virðist fækka blaðamönnunum sem þekkja orðin kýr og kindur.  Aftur á móti er alltaf freistandi stuðlanna vegna að tala um beljur á beit!

Baráttan um verðið

Ugglaust geta allir séð
að ekki er grín á ferðum
þegar búðir berjast með
beittum tilboðs(s)verðum!

Svindl og samráð

Í verslunum oft eru vörurnar sviknar.
Verðið er bara feik.
Litlum af neistanum loginn oft kviknar.
Lúkas er kominn á kreik.

Alþjóðavæðing

Til að forðast fjósamennsku
og flónsku óuppdregna
mun víst best að yrkja á ensku
útrásarinnar vegna.

Raunar mun ég þurfa að ráða til mín undirverktaka þar sem ég hef ekki nægilegt vald á enskri tungu……

Eitt er nauðsynlegt

Þeir munu eflaust þurfa að vinna
að þjálfun heilavöðvanna
sem hafa núna hug á að sinna
högum ratsjárstöðvanna.

„Íslensk stjórnvöld þurfa að ákveða framtíð ratsjárstöðva“

Hugsi-hugs

Til að fyrirbyggja hugsanlegan misskilning vil ég taka það sérstaklega fram að í eftirfarandi stöku er skáldið ekki að meina neina sérstaka einstaklinga. (Yfirhöfuð reyndar ekki að meina neitt, þótt það megi nú ekki vitnast, því það rýrir gildi skáldskaparins.)

Ættgeng er varla sú veila
sem virðist þó marga hrjá,
sem eru með handknúna heila
og hugsa oftast á ská.

          
 

Kolefnisjöfnuður

Mig langar að láta kolefnisjafna bílinn minn. Hugsa að gangurinn verði þýðari við það.
Ég byrjaði að leita í símaskránni. Fann ekkert kolefnisjöfnunarverkstæði. Kannski væri hægt að fá bara kolefnisjafnaðarmann heim til þessa verks. Kolefniskrata. Skyldi Össur vera kolefniskrati? Ég kann ekki við að hringja í hann og spyrja. Þekki hann ekki neitt. Umfram það sem maður  kynnist opinberum persónum í fjölmiðlum. Hvað á ég að gera? Segið mér ekki að fara og planta trjám. Ég ætla sko ekkert að fara að kolefnisjafna fyrir Pétur og Pál. Bara minn eigin bíl og ekkert annað. Það er annars ljótt með bílafjölgunina í Kína. Svei mér sem þeir þurfa að kolefnisjafna. Spurning hvort það er nokkurt pláss fyrir öll þau tré sem til þess þarf.