Þú hreina svarta....

Einhverju sinni reyndi ég að heyra hvernig textinn var sem karlakórinn söng. Mér heyrðist hann vera einhvernveginn svona:

Þú hreina svarta bindið mitt.
við hörmum spilltra vanda.
Fram laðar kvartett trosið sitt,
þá er hér naumast andað.
Ég finn mér innst í hálsi hrjá
- svo marga þynnri hendir-
þar sneið af pylsu er föst á ská,
svo nú kom verri endir.

En nú hef ég komist yfir þennan texta og er hann á þennan veg:

Þú eina hjartans yndið mitt
í örmum villtra stranda
þar aðeins bjarta brosið þitt
mig ber til draumalanda.
Í þinni finn ég frjálsri brá
svo fagrar innri kenndir
er seiða til sín traust og þrá
í trú sem hærra bendir.

Þannig var nú það.

Athugasemdir

[Rúna Guðfinnsdóttir, 8.11.2008 kl. 14:05]

Já Hallmundur, svona getur manni nú misheyrst illilega

[Hulda Brynjólfsdóttir, 8.11.2008 kl. 15:01]

Mér fannst örla á smá neikvæðum tón þarna til að byrja með, en svo sá ég að það var misheyrn

[Hallmundur Kristinsson, 8.11.2008 kl. 17:36]

Mín misheyrn átti sér raunar stað löngu áður en spilltra vandi olli vanda okkar allra! ()

[Hólmdís Hjartardóttir, 9.11.2008 kl. 01:42]