Varúð

Allir þeir sem yrkja stökur
ættu nú að vara sig,
enda tíðkast yfirtökur
og því rétt að spara sig.

Athugasemdir

[Ben.Ax. (Benedikt Jóhannes Axelsson), 9.10.2008 kl. 08:17]

Í upphafi allt var hér skapað
og ekki að neinu var hrapað.
Rauðahafið er rautt
og það dauða er dautt
en enginn veit ennþá hver drap það.

[Hallmundur Kristinsson, 9.10.2008 kl. 08:22]

Ég yfirtek þessa, Benedikt!   

[Ben.Ax. (Benedikt Jóhannes Axelsson), 9.10.2008 kl. 13:37]

Í Hofsstaðaskóla voru fáir karlmenn og við því oft ávarpaðir í kvenkyni. Á löngum fundi sátum við tveir, ég og Eiríkur, en okkur var lofað kaffi og kleinum í fundarhléi. Í hléinu var ort.

Í kaffi og kleinu okkur langar
eftir kröftugar ræður og strangar.
Nú hættum við hér,
það heppilegt er
því við Eiríkur erum svo svangar.

[Ben.Ax. (Benedikt Jóhannes Axelsson), 9.10.2008 kl. 13:42]

Á kennaraþingi var rætt um samvinnu og komu menn sér saman um að hún þyrfti að vera rétt og helst lóðrétt ef árangur ætti að nást. Þá var ort:

Harður er kjarni vors kennarablóðs
ef kraftana stillum til samans.
Sé samvinnan lóðrétt, hún leiðir til góðs
en sú lárétta er meira til gamans.