Yrking III

Ekki hef ég alltaf verið svo viss um vinsældir yrkinga minna. Eftirfarandi hendingar eru áratuga gamlar:

Þegar loks héðan af foldu ég fer
og fjörið er storknað í æðum,
þá verður enginn sem man eftir mér
og  mínum ágætu kvæðum.

Þá minnist mín enginn af íslenskri þjóð,
og enginn mun kvæði mín þylja,
því þegar ég yrki þá yrki ég ljóð,
sem enginn fær megnað að skilja.

 

 

Athugasemdir

[Hólmdís Hjartardóttir, 6.9.2008 kl. 20:01]

Hrafnkell Brimar mun gefa út vísurnar þínar...........

[Hallmundur Kristinsson, 6.9.2008 kl. 20:24]

Og þá munu upp ljúkast augu þjóðarinnar og hún sjá hvílíkur snillingur þar var genginn! ......

[Hólmdís Hjartardóttir, 6.9.2008 kl. 20:35]

auðvitað.  Afi minn á Björk var dágóður vísnasmiður. Eftir andlát hans hugðum við gott til glóðarinnar að komast í þann fjársjóð.    En hann hafði eytt öllu...........ekki gera það.

[Hallmundur Kristinsson, 6.9.2008 kl. 21:25]

Ætli hann hafi ekki bara ýtt óvart á delete, blessaður.......!!   Ég held að ég tími ekki að farga neinu, hins vegar hef ég stundum ætlað að tína þetta eitthvað saman,  en hefur ávallt  fallist hendur. Þetta er í hinum og þessum tölvum,  misónýtum, og það elsta á gulnuðum blöðum.

[Hólmdís Hjartardóttir, 6.9.2008 kl. 22:49]

Afi snerti aldrei tölvu...........þetta var meðvitað

[Hallmundur Kristinsson, 6.9.2008 kl. 23:34]

Ég þóttist nú vita það. Þess vegna þótti mér fyndið að taka svona til orða 

[Hulda Brynjólfsdóttir, 8.9.2008 kl. 22:05]

Góðir punktar.

Tek undir með Hólmdísi,- ekki ýta á delete

[Eyþór Árnason, 8.9.2008 kl. 22:19]

Meðan maður hefur gaman af þessu sjálfur þá er þetta gott. Flottar vísur. Kveðja.

[Hallmundur Kristinsson, 8.9.2008 kl. 22:22]

Það var lóðið, Eyþór!

[Rúna Guðfinnsdóttir, 10.9.2008 kl. 20:50]

              Ógleymdur um ár og síð

þú örugga hefur von,

hnyttinn í orða hagleikssmíð

Hallmundur Kristinsson.

(Hef sömu áhyggjur og þú...snilldin fer í gröfina með mér..)

                

[Hallmundur Kristinsson, 11.9.2008 kl. 00:38]

Takk fyrir þessa vísu, Rúna. Ég skoðaði bloggsíðu þína og held ég bara grafi upp snilli þína fari hún með þér....
(sénsinn að ég geri það . . . ég ætti að fara 14 árum á undan þér ) 

[Rúna Guðfinnsdóttir, 11.9.2008 kl. 16:54]

Enginn veit sína ævina fyrr en öll er...ekki satt?!

Mjög skemmtilegar vísur hjá þér og lipurlega kveðnar!  Ég er afar mistæk...stundum rennur þetta uppúr mér en í annan tíma kemur ekki lína!

Kveðjur og heilsanir af Ströndinni

[Hallmundur Kristinsson, 11.9.2008 kl. 23:40]

Mælt var svo í minni sveit:
margur er lífsins auður.
Ævi sína enginn veit
áður en hann er dauður.