Sex í Reykjavík

Fyrir fáum árum var sýndur í sjónvarpi þáttur með þessu nafni. Ekki man ég hvernig efni hans var, en hins vegar man ég vísuna, sem ég orti eftir að hafa séð hann:

Áður fyrr var helgidómur hofið.
Það hefur breytt um svip með tímans flæði.
Nú glæstar meyjar glenna í sundur klofið
og gera það að áhorfendasvæði.

Athugasemdir

[Sir Magister (IP-tala skráð) 15.12.2007 kl. 08:18]

Glettilegur...hverju orði sannarra!!

[Jóna Guðmundsdóttir, 16.12.2007 kl. 22:53]

Sæll

Var að lesa nokkrar vísur hjá þér aftur í tímann - takk fyrir þær.

Ertu annars nokkuð með fleiri vísur úr Möðruvallamunkabálknum - væri til í að sjá fleiri þaðan.

[Hallmundur Kristinsson, 17.12.2007 kl. 00:17]

Blessuð Jóna og takkfyrir allar limrurnar. Þær eru margar hverjar stórsnjallar. Ekki man ég nú margar vísur úr þessum bálki, einhverjar þó. Einhversstaðar á ég þetta skrifað en ekki ákaflega aðgengilegt. Annars lét ég mér ekki nægja að yrkja um leikendur, heldur gerði vísnabálk um efni verksins. Veit ekki hvort ég nenni að setja þetta á bloggið, en ef ég fengi hjá þér netfang er aldrei að vita hvað gerðist með tímanum!

Ein um leikara:

Hafsteinn munkinn lék af list (lyst).
Leguvoðum undir
átti hann með Immu Rist
yndislegar stundir.

Hér er að sjálfsögðu vísað í hlutverk þeirra í leiknum en ekki verið að saka þau um framhjáhöld!

[Jóna Guðmundsdóttir, 17.12.2007 kl. 23:58]

Sæll aftur

Það væri ekki leiðinlegt að sjá fleiri vísur - þetta leikrit er mér mjög minnisstætt enda hafði ég ekki séð þau mörg þegar hér var komið sögu.

Netfangið mitt er [e-mail] ef þú rifjar upp meira....