Í eyrurnum

Fyrir um það bil mánuði síðan setti ég hér inn vísu um það þegar hagkaupsmenn voru dregnir á asnaeyrunum. Þar rímaði ég eyrunum -  Leirunum.   En það var ekki í fyrsta skipti sem ég nota þessi rímorð. Fyrir afar mörgum árum  tók ég þátt í leiksýningu hjá Leikfélagi Akureyrar á Munkunum á Möðruvöllum. Gerði ég mér það þá til til dundurs að yrkja vísur um þá sem tóku þátt í sýningunni. Þetta varð allnokkur vísnabálkur, því þetta var mannmörg sýning. Síðasta vísan er ein af þeim fáu sem ég kann utanbókar:

Þá er bara eftir einn
innan úr Leirunum:
Náungi sem nefnist Hreinn
nema í eyrunum.

Hreini þessum varð nú ekki um og fór að afsaka eyrun á sér því hann áttaði sig ekki strax á því að þetta með eyrun var nú svo sem bara rímsins vegna. Á nútímavísu hefði líklega verið sagt að ég hefði náð honum - að hann hefði verið tekinn.
Þess má að lokum geta að Hreinn þessi er mektarlögmaður hér í bæ og gætir þess enn sem ávallt áður að þvo sér vel um eyrun!

Athugasemdir

[Hallgrímur Óli Helgason, 2.12.2007 kl. 21:59]

[Hallmundur Kristinsson, 2.12.2007 kl. 22:57]