Tvær gamlar

Á sjöunda áratug síðustu aldar deildu menn ekki aðeins um hvort væru betri Chevrolet eða Ford, heldur einnig Land-Rover eða Austin Gipsy. Fjaðrabúnaður Gipsy var nokkuð sérstakur og höfðu sumir fyrir satt að hann byggðist á einskonar loftpúðum, en svo mun þó ekki hafa verið, heldur var um að ræða einhverskonar gúmmíhólka, sem snúið var uppá og gáfu fjöðrun. Land-Roverinn hafði hinsvegar hefðbundnar blaðfjaðrir. En vísurnar sem hér fara á eftir spruttu upp úr áðurgreindum metingi manna á milli Land-Rover og Austin Gipsy.

Slamt er það að aka ei
Austin fjaðurpúðum
láti maður lífsins fley
löngum vaða á súðum.

Kvelur stöðugt hristings hoss.
Harða tröð ég renni.
Stíf er fjöður undir oss
enda blöð í henni.