Sálmar anno 1975

Þeir sem  þokkalega fullorðnir eru og með nokkurt langtímaminni muna ef til vill að árið 1975 var á Íslandi helgað konum. Á því ári og af því tilefni setti ég saman sálma, sem ég kallaði kvennaárssálma. Sálmarnir voru þrír talsins og flokkaðir eftir innihaldi. Sá fyrsti var fjögur erindi og hér er hið fyrsta:

1.sálmur.

Um komu konunnar í ríki mannsins.

 
Fyrst var í heimi Adam einn.
Engin hann kona glapti.
Umhverfis hann var ekki neinn
í hann sem slúðrið lapti.
Saklaus var og í huga hreinn
Herrann uns Evu skapti.

Athugasemdir

[Jón Valur Jensson, 25.6.2007 kl. 23:43]

Þakka þér braginn snjalla í gömlum stíl, Hallmundur. Kveikti þennan hjá mér:

Í konu góða kraftur fer,

kossar, tár og sviti.

Kviðling þennan (þykir mér)

þú hefur ort af viti.

Svo er þetta alveg rétt hjá herra Limrunni, að þú þarft að ná augum lesenda.

[Hallmundur Kristinsson, 26.6.2007 kl. 00:04]

Takk fyrir tilskrifin og vísurnar, þið tveir.Þið hafið kannski tekið eftir taktikinni hjá mér að setja eitt erindi í einu. Það var auðvitað til þess að haldast lengur inni á síðunni nýjustu færslur. Annars er mér það ekki svo mikið kappsmál sem ég læt að ná til fjöldans. Að gleðja einhvern einn nægir mér í rauninni alveg. Hitt er bara svona einskonar veiðiskapur.