Skrúfa fyrir

Sóun er þetta segi ég bara!
Sjáið þið alls ekki neitt?
Vitið þið ekki að vatn á að spara
ef viljið þið að það sé heitt!

Metnotkun á heitu vatni

Heitt & kalt

Passa þarf vel í hvað peningar fara.
Prósentur best er að skrá.
Vatnið í borginni verður að spara,
en vökva samt pálma og strá.

Útlit fyrir metnotkun um helgina

Ræktun

Allir sjá ef að er gáð
ýmsar gerðir tálmana.
Ég held það væri heillaráð
að hætta strax við pálmana.

Pálmarnir sagðir rómantískt fíaskó

Bjargráð Bjarna

Oft veldur nauðar og ofgnóttar bil
erfiðu samningaþjarki.
Til þess að laga það leggjum við til
lækkun á frítekjumarki.

Skattatillögur ASÍ auki jaðarskatta

Sýslað í Eyjum

Vikið hefur fetið frá
flokksböndunum tryggu.
Páli líst víst ekkert á
atferlið hjá Siggu.

Páll óánægður með dómsmálaráðherra

Skítur á priki

Stoltur kynnir holu-Hjálmar,
hróðugur, laus við nísku:
Stæðilegir Strandapálmar!
(strá eru dottin úr tísku)

„Í hvaða heimi lifir Hjálmar Sveinsson?“

Klausturbólga

Svekktir vilja sumir banna
svona rugludólga,
enda flestra Miðflokksmanna
á meðal nokkur ólga.

Ólga meðal Miðflokksmanna

Á Alþingi eftir hádegið

Umræðupólitík veggjaldavæðingar
vansælir nefndarmenn studdu.
En burgeisar núna og bókmenntafræðingar
blaða í hvítri skruddu.

Veggjöldin eiga nokkuð í land

Átti fundurinn ekki heima á Klaustri?

Málefni fundarins mun ég nú skýra:
Miðflokknum búin var hefnd.
En aumingja Bergþór vill auðvitað stýra
auðlindasamgöngunefnd.

Orðbragðið engu skárra en á Klaustri

Drög að sannleika

Píratarnir naga neglur,
nú skal leggja drög...
Augljóst mun að ýmsar reglur
ekki standast lög.

Verði að meta sannleiksgildi ummælanna