Óvissa

Búast má við breyttun svip;
betri að mörgu leyti.
"Alltaf má fá annað skip
og annað föruneyti!"

Allri áhöfn Sólborgar sagt upp

Afturgöngur

Þar voru þandar taugar;
þvílíkur fítonskraftur!
Þá voru dáðir draugar
er druslurnar gengu aftur!

Myndir: Druslur gengu aftur um miðbæ Reykjavíkur

Ekki rétta málningin?

Afsakið, já aðeins bíðið,
yður við ég nefni:
ef þér vilduð verjast stríðið,
vantar betra efni!

Málaði „stop war“ og var handtekin

Bót í máli

Verðlagið virðist hækkandi.
Vondur þykir sá fjandi.
Gott þó að fari fækkandi
fávitum hér á landi.

Segir fávitunum fara fækkandi

Engin fyrirhöfn

Vel skyldi ávallt að verslunum hlúð
og viðskiptum. Gott er að heyra
sagt frá alveg hreint sjálfvirkri búð
svo að við keypt getum meira.

Fyrsta alsjálfvirka matvörubúðin opnaði í dag

Hér og þar

Heldur lítið hafa að gera
hér um þessar slóðir,
en einhversstaðar verða að vera
vondir bæði og góðir!

Áhyggjur af hjólhýsafólki í Laugardal

Skatturinn þarf húsaskjól

Stórhýsin rísa hlið við hlið;
hafa sum gert menn ríka.
Ört þýtur höllin upp á við.
Efalaust skatturinn líka.

Höfuðstöðvar Skattsins „þjóta“ upp

Hugkvæmni - Hagkvæmni

Landinn fær sér lokur þær
sem Litháarnir smyrja.
Hagnaðurinn hreinn og tær,
hann er rétt að byrja!

Smurðar samlokur fluttar alla leið frá Litháen

Á salerninu

Mikið var sá maður lúinn.
Meðvitundin rofnaði.
En hvort var hann alveg búinn
áður en hann sofnaði?

Sofnaði á salerni og missti af flugi

Vísir í vinnslu

Umræða dagsins dökkleit er.
Degi er heitt í sinni.
Atburðarásin eftir fer
uppskrift úr Verbúðinni!

„Eins og sena úr Verbúðinni“