Veðurvísa

Staðviðri er stundum tregt.

Stefnir oft að fári.

Þó er veðrið þolanlegt

það sem af er ári.

Áramót

Verði okkur fjarri fár.
Fjöldinn hvergi smáður.
Nú er komið nýrra ár
en nokkurn tíma áður.

Áramótaheit

Áramótaheit Mátti heyra í mýri hróp;
mörgum var til baga það.
Stofnum um það stýrihóp
og stefnum á að laga það!

Líður að áramótum

Varla árinu við er snúið.

Vel það hefur dugað.

Nú er hið gamla næstum búið.

En nýtt er fyrirhugað.

Snjór

Ofsaveður, orðið svalt.

Ástand þarf að meta kalt.

Illt að moka.

Farartól af vegi valt,

en vegunum skal umfram allt

ekki loka!

Líklega mesti snjór í áratugi

Mokið, mokið og mokið

Ennþá hefur aftur hvesst,

auki færst í rokurnar.

Er þá ekki bara best

að banna vegalokurnar?

 

Við þurfum svo sem ekki að elta

ólar við þessar kviður.

Fleiri rútur fái að velta.

Friður sé með yður.

Vegagerð,lögregla,björgunarsveitir

Sigurður Ingi mun átelja slíka
umferðarstjórnendabjálfa.
Skyldi hann velja til viðræðna líka
veðurguðina sjálfa?

Flugfært en ekki ökufært

Erfitt val

Málið binda má í hlekki
svo megi þannig letra.
Sem nú vísu, eða ekki,
eftir því hvort er betra

Það reddast

Ágætar vísurnar yrkja ég kann,
þótt innihaldsvöntun ég nefni.
Það sem að lokum í þessa ég fann,
það var fagnaðarefni!

Þurrð

Ég ligg upp í rúmi og nenni ekki neinu.

Norðaustanáttin er köld.

Ekki neitt meira, en eitt er á hreinu:

Engin vísa í kvöld!