Kóngur vill sigla...

Flókið er ferð að plana.
Ég færi þó ef ég þyrði.
Baldur er vélarvana
að velkjast á Breiðafirði.

Farþegaferjan Baldur vélarvana á Breiðafirði

Skallaskjall

Þessir eru býsna margt að bralla.

Það besta er og þykir alltaf gott;

að flestir hafi skolli fína skalla

skiljanlega þykir bara flott!

Frægustu íslensku skallarnir

Heima hjá pabba og mömmu

Börn skuli foreldrum búa mest hjá,

bitnum af skuldanna tönnum.

Með því er auðvelt að forða þeim frá

fjárglæfrabankanna mönnum.

Gætu þurft að búa lengur í foreldrahúsum

Vinstri blágrænir

Feigðargötu fer á brokki

flokkurinn með hraði.

Víkja skal úr verndarflokki

og virkja nokkra staði.

 

Vatnsaflsvirkjun ein og ein

enginn þykir skaði.

Áfram streymir orkan hrein.

Allt fer vel á blaði.

Rammaáætlun III samþykkt

Áhyggjuefni

Að koma á lögum um verslun á víni
virðst mér töluverð brekka.
Fráleitt um þetta að fjalla í gríni.
Fæ ég þá ekkert að drekka?

Ekki náð að stilla sér saman um netverslun áfengis

Ég ræð

Hér skal tefla minni mekt
á móti þínum vilja.
Allt er þetta eðlilegt
eins og gefur að skilja!

Gagnrýni Miðflokksins komi úr hörðustu átt

Vissu fleiri

Skapast vá af veirum.
Vont að ná ei sátt.
Þetta fannst nú fleirum,
þótt færi ekki hátt.

Ráðherrar tjáðu sig óvarlega og ófaglega

Draumurinn

Til Vestmannaeyja er leiðin löng
og Langeyjarsandur baldinn.
Freistandi væri að grafa göng
í gegn um brimöldufaldinn!

Göng slegin af vegna kostnaðar og óvissu

Þriggja stiga viðbrögð

Vei þeim sem á verði sofna,

víst þá skamma má.

Vegna þessa strax ég stofna

stýrihópa þrjá.

Setur saman viðbragðsteymi vegna neyðarástands

Speki

Auðnu sína enginn flýr.

Ýmsir njóta hylli,

hvort sem þar að baki býr

brjálsemi eða snilli.