Áreiti

Í refskák hvorki fast né laust þeir láta.
Leika peðum eftir reitum fínum.
Karlar reyna konurnar að máta
og keppast við að tefla hrókum sínum.

Skákkonur hafi verið áreittar á Reykjavíkurmótinu

Efst á hæðinni

Trúna bæði rétta og ranga

reyndi hann að fanga.

Á fúnum krossi fékk að hanga

föstudaginn langa.

Á Austurvelli

Erfiðra spurninga oft er spurt.
Illgresi kæfir marga jurt.
Allmargir vilja Bjarna burt,
bara snúið að vita hvurt!

Mótmæla bankasölunni á Austurvelli

Ofurráðherra

Verkþætti margra manna
meður árangri bestum
rösklega reynist spanna
í ráðuneytunum flestum!

Fáir við ríkisstjórnarborðið

Gleðilega páska

Sumir bankasölumenn
sýnast brátt í háska,
þó að Lilja ætli enn
að eiga góða paska.

Ætlar að fá að njóta páskafrísins í friði

Efling

Sumun þykir Sólveig hroka
sýna, það sé henni tamt.
Burt með allar peysur og poka!
Páskar munu koma samt.

Öllu starfsfólki Eflingar verður sagt upp

Fagfjárfestar

Frjálsir þeir ganga um borgir og bý.

Bærileg er þeirra líðan.

Fjármálagildrunum festust þeir í

Fjárfestar kallast víst síðan.

Forstjóri bankasýslunnar ætlar ekki að víkja

Í upphafi skyldi...

Hér var ei hugsað til enda,
sem hendir oft stjórnmálamenn.
Hvar á að lokum að lenda
ljóst er víst hreint ekki enn.

Nokkuð ljóst að kosningalögin verði skoðuð

Kemur fáum á óvart

Fljótt nú myndast fjöldahreyfing.
Fólkið skilur eðli þankans:
Ásættanleg ættardreifing
á eignarhaldi gróðabankans!

Óskadreifing á eignarhaldi bankans

Hlaupa í skarðið

Bras er að tollera bombuna slíka.
Bændurnir aðstoð þó fengu:
Miðflokksmennirnir lyft´henni líka,
en lugu að sjálfsögðu engu.

Miðflokksmenn lyftu líka Vigdísi