Gleðilegt sumar!

Samkvæmt hefðum sést nú betur
í sumar verði gaman
fyrst að bæði vor og vetur
voru að frjósa saman.

Og ekki skemmir fyrir að jafnað var yfir samskeytin með smá snjóföl!
Gleðilegt sumar :)

Hretórar

Heldur kólnar, haustar að.
Hann á ýmsu lumar.
Okkur ber að þakka það;
þetta stutta sumar!

Vaðlaheiðarvaðlar

Sýnist mér af sama meiði,
svipuð þeirra gjörðin,
Vaðlarnir í Vaðlaheiði
og Vaðlarnir við fjörðinn.

Vatn

Von er til að Vaðlaheiði batni
ef verktakarnir sinna henni af natni.
Þótt sýnist raunar vera full af vatni
vænta má það einhverntíma sjatni.

Skilji hver sem vill hvernig sem vill!

Taka þarf á tekjuvanda.
Tukta nú í þessu skyni
helst má ekki HB Granda
honum Birni Snæbjörnssyni.

Segir oft glymja hæst í tómri tunnu

Þjóðráð

Allnokkra breytingu þekki ég þarfa,
sem þjóðinni forðaði raunum:
Að úthluta pöpulnum stjórnunarstarfa-
stærðargráðu í launum.

Ólíkir hópar með ólíkar kröfur

Ógn

Á meðan fólk um borg og bý
býr við kjaralöskun
stanslaust virðist stefna í
stöðugleikaröskun.

Staðan er „grafalvarleg“

Litli skattur

Fyrir skráð og skammlaust puð
er skammtað minna en flestir vona.
Bæði HB Grandi og guð
gera þetta oftast svona.

Gagnrýndu hækkun stjórnarlauna

Hver?

Hann er svo hugmyndaríkur
að hæfni til engum líkur.
Hvert sem hann fer
og hvar sem hann er
hvergi finnst annar slíkur.

Gulllimra

Þá yrkja ég ekki nenni
en orðsnilldar samt ég kenni,
er limran mín lausn.
Ég læt þá af rausn
gullkornin glóa í henni.