Bankastjóralaunin

Hækkuðu nýlega og hækka aftur senn
og hækka þá meira en síðast.
Ég sagði það áður og segi það enn:
Svona á bara alls ekki að líðast!

Sturlaðar launahækkanir

Ábyrgðin

Engu að lauma til eigin handa
er efalaust nokkur raun.
Svo falli hún ekki í freistnivanda
fá þarf sæmileg laun.

82% launahækkun varla talist hófleg

Smávegis

Þótt einhver það væri sem ekki mætti;
auð sæti þegar ég gáði
voru ekki svo mörg að markvert þætti
og munaði nokkru að ráði.

Vandræði á leið í Þjóðleikhús

Það sést til þín

Herrann sem himnunum á
hangir og allt þykist sjá
gefur því gætur
er glaður þú lætur
seðlana sjálfan þig fá.

Drífa kallar eftir aðgerðum

Forðumst matarsóun

Ef það er maðkur í mysunni,
í mjölinu eitthvað kvikt,
gagnast það kannski kisunni
sem kemst gegnum þunnt og þykkt.

Innkalla haframjöl vegna skordýra

***

Þetta er orðinn langur lestur.
Líka tjón.
Sannleikur er sagna bestur,
segir Jón.

„Sannleikurinn er sagna bestur,“ segir Jón Baldvin

Blessað veðrið

Leiðindaveður og lélegt skyggni
vér látum ei á oss fá.
Bílstjórar reyna með hugdirfsku og hyggni
að hanga veginum á.

Vegir lokist í nærri sólarhring

Viðskiptamódel

Sumarbústað nú ætla í.
Ekkert mun þörf að fela.
Leigusamningar lúta að því
að lausafé megi stela.

Leigði bústað og stal úr honum

Steingrímur

Hvort við græðum baun á Bakka
er bara ekki víst.
En alltaf verður þér að þakka
það sem af því hlýst.

Framtíðin sker úr um Bakka

Reyndar...

Misjafnt er oftlega geðslagið guma.
Grínið ei öllum er tamt.
Almenn leiðindi einkenna suma
sem ekki eru handteknir samt.

Með almenn leiðindi og óviðræðuhæfur