Salka Sól

Einfaldlega Sölku Sól
sæmir vel hið mesta hól:
Uppá sína alla fingur
alveg veit hvað best hún syngur,
svo sem rokk og ról,
rapp og gól.

Salka stofnar de la Sól

Vandræði

Vísnatregðu þessa þekki:
Það er líkt og ég sé geldur.
Reyni þá að yrkja ekki.
Ekki gengur það víst heldur!

Leti

Rignir enn á lög og láð.
Í laumi klukkan gengur.
Kannski væri kostaráð
að kúra aðeins lengur!

Rólegheit

Á laugardagskvöldum er friður á fési.
Fáir virðast á netinu.
Nú er rólegt á Reykjanesi;
réttast að kúra í fletinu.

Hreinasta perla?

Af því Perlan er sem blý
einkanlega að framan,
komin er í kaf á ný.
Körlum finnst ei gaman.

Dæla úr Perlu að nýju

Borið í bakkafullan lækinn

Þótt fyrir komi ég fái lof
fyrir vísu búna,
kannski er það nú einum of
að yrkja meira núna!

 

 

 

Nýr Landspítali

Eigi að finna annan stað
er ég næsta viss um það:
Framkvæmdin þá frestast mun
fram yfir næsta hrun.

 

Umræðuháttur

Ég velti fyrir mér vanda því
ég veit ekki á því sanninn
hvort sé betra að bíta í
boltann eða manninn.

Rímið ræður

Auka gjarnan vil ég veg
vísna sem ég megna,
en margar slíkar yrki ég
aðeins rímsins vegna.

Ómerkileg vísa

Þótt vísu þessa vel ég skoði
og vandi hennar gerð,
er hún fremur rýr í roði;
raunar einskis verð.