Verum jákvæð

Ég vil semja lítið ljóð
ljóskunni til varnar:
Hún er bara býsna góð
við blómaskreytingarnar.

Mótmæla framgöngu Vigdísar

Veðurspá

Himnafeðgar hyggja á plott.
Helst mig fer að gruna;
veðrið núna virðist gott,
en versna kann til muna.

Ál ál ál og aftur ál

Í huga manna greypt er graf
af gróða, tengdum áli,
en skaðinn sem þar skapast af
skiptir ekki máli.

Veður

Veðurfarið vel ég þekki,
vetur gefur þennan kost:
Stundum hríðar, stundum ekki.
Stundum þá er bara frost.

Draumur utanríkisráðherra

Þ S S Í þarf að fara
þangað sem ég hef öll tök.
Eiginlega af því bara.
Eru það ekki fullgild rök?

Sport

Iðkað hef ég andans sport
á öllum koppagrundum.
Góðar vísur get ég ort
og geri það líka stundum!

Taki þeir til sín sem eiga

Það er meira hve margir hrífast
mikið af því að rífast.
Mætustu menn
munnhöggvast enn.
Virðast af þessu þrífast.

Tillaga að auglýsingu

Ef af monný áttu böns,
ertu mjög vel settur,
fengið getur feitan bröns
og farið burtu mettur.

Engar kjarabætur

 

Æskan horfin er á braut,
ellimarka kenni.
Ég er eins og jólaskraut,
ég er gamalmenni.

 

Löngum reynist lífið staut.
Lágt ég bogann spenni.
Ég er eins og jólaskraut,
ég er gamalmenni.

 

Eðalkjara aldrei naut,
eyði þó og spenni.
Ég er eins og jólaskraut,
ég er gamalmenni.

 

Að eiga salt í grjónagraut
er gott ef elda nenni.
Ég er eins og jólaskraut,
ég er gamalmenni.

 

Hvernig mér er búin braut
blint í sjóinn renni.
Ég er eins og jólaskraut,
ég er gamalmenni.

Kjarabætur II

Væri kannski hægt að koma ellilífeyrisnautum og öryrkjum undir úrskurði kjararáðs?