Sýking

Ráðamenn smávegis smeykir
smokrast í felur vitandi:
Verðir laganna veikir
og veiran trúlega smitandi.

Verkfallsboðun

Ég er hér með ráð gegn raunum
sem reyna á ellismellina:
Hefjum stríð gegn lágum launum;
leggjum niður ellina!

Ofbeldi

Í speglinum var fjallað um samfélagslegan kostnað vegna heimilisofbeldi og gengið útfrá ofbeldi karla gegn konum.

Mál þessi valda að vonum
vonbrigðum. Svo er hitt;
ofbeldi karla gegn konum
kostar auðvitað sitt.

Spá

Rökin styðja um regnið grun,
rok mun og til baga.
Veðrið þannig virðist mun
verða næstu daga.

Nú er veður til þess að skapa

Sé manni eitthvað í geðinu gramt
er gagnslítið andann að virkja,
en þrátt fyrir vesældóm virðist mér samt
veður til þess að yrkja!

Friðþjófur, Varði og Benedikt Barði.

Friðþjófur fyrr en Varði
flutti sitt bú að Skarði.
Sterkur og stór
á staðinn hann fór
og síðan Benedikt Barði.

Aukahlutur

Kannski vantaði straum í start
þótt stjórninni yrði send
sem utanáliggjandi aukapart
einhver réttlætiskennd.

Ein mánaðarlaun 5.621.179

Þótt orku sé undir hallur
ekki mundi ég vel jann
Dýr væri Illugi allur.
Ætti ekki bara að selj ann?

Það er nú svo

Stína var margháttuð mær,
mörgum sérdeilis kær.
Það reynist ei rugl
að rígbundinn fugl
sveltur en fljúgandi fær.

Hættuástand

Krimmum og bófunum vara má við;
þeir valda mér áhyggju þungri,
nú þegar örmagna lögreglulið
lyppast niður af hungri.

„Lögreglustöðin er lokuð í dag“